الحبيب محمد احمد حسن اوشي نسئل الله ان تعود الي الوطن وتجده ينعم بالدمقراطيه

محمداحمد حسن اوشى بسم الله الرحمن الرحيم
الله أكبر ولله الحمد

لو ادونا سنوات نوح ومدوا أجلنا في الازمان
وحسبوا عمرنا في الخالدين أو أدونا عمر الجان
...ما بنلحق يمين نافع والسواه في السودان
وهاك يانافع القصة قصة ناس هووا الاوطان
وما باعوها يوم لزول وما ساموها ذي الضآن
مهدي الله وأصحابو دعا الراتب صدي القرآن
دم الشهداء في كرري هزيمة أعداءنا في شيكان
منو الإتصدي للطاغوت وحرر بلدو ليها وصان
منو الإتحدي للعسكر ورفض الظلم والطغيان
وما أتجاوزنا رأي الشعب حكمنا بلدنا بالإحسان
وما جابتنا دبابة وما أتـحولنا لسجان
منو اليانافع إتنكر لعهدو وخان
وقام بليل غلب حالنا ونصب نفسو هو السلطان
وسل السيف علي شعبو سقاه الذل معاه هوان
شنو السويتو يانافع وبيه إتشرف السودان
بعد ما حرة كلمتنا تبعنا اروبا وامريكان
بعد ما بيضة سيرتنا لحقنا البومة والغربان
ودينا القلت أنقذتو هزمت الشرك والشيطان
منو الصادر مساجدنا منع صلواتنا والآذان
وضرب الناس وهم ساجدين جوه مساجد الرحمن
منو البكانا يوم العيد وكتل الشهداء في رمضان
شنو السويتو يانافع وبيه أتشرف السودان
حربنا القلت حليتها غيرها فتحت كم نيران
والأمن القلت وفرتو خليل ما جاك في أم درمان
هداك أوكامبو متربص يحاكم صاحب الصولجان
يهدد حكمك الثابت يزلزل عرشو والاركان
شنو السويتو يانافع وبيهو أتشرف السودان
بلدنا القلت نميتها شوف شعبك فقير جيعان
ولو ما قلت بترولنا وينو الصمغ والأقطان
ولو شيدتو كم كبري وحتي بنيتو كم خزان
شعبك يفتش اللقمة وبراك إنت بتنوم شبعان
جاي الليلة تتأمل حكمك يدوم مدي الأزمان
وين منقستو وين هتلر صبحو في عالم النسيان
ووين أب عاج ووينو غرورو لما الشعب جاهو طوفان
بتسقط كيف حكومة إنقاد ؟ بتسقط برضي الرحمن
دعا المظلوم غضب شفع ضاقو في عهدها الحرمان
بناس ابريل واكتوبر لما يوحدو الكيمان
يهبو يحطمووترجع عزة السودان
بتصبح ذكري يانافع بدون معني وبدون عنوان